1.

Faustus dixit: Accipis testamentum vetus? Si est mihi in eo hereditas, accipio ; si non est, non accipio. p. 268,10 Improbitas enim haec quidem nimia est usurpare tabulas, quae testentur exheredatum.

An ignoras testamentum vetus Chananaeorum terram repromittere, sed eam tamen Iudaeis, id est circumcisis et sacrificantibus et abstinentibus a porcina ac reliquis carnibus, quas immundas Moyses appellat, sabbata observantibus et azymorum sollemnitatem ac reliqua huiusmodi, quae eius ipse testator eis observanda mandavit?

Quae quia christianorum placuere nemini – neque enim quisquam nostrorum ea custodit – dignum est, ut cum refusa hereditate reddamus et tabulas.

Haec ergo causa est, cur ego testamentum vetus abiciendum puto, nisi tu me prudentius aliquid doceas. p. 268,21

Secunda vero causa est, quod tam etiam misera eius et corporalis ac longe ab animae commodis hereditas est, ut post beatam illam novi testamenti pollicitationem, quae caelorum mihi regnum et vitam perpetuam repromittit, etiam si gratis eam mihi testator suus ingereret, fastidissem.