3.

Proinde nec vos, ut dicere coeperam, de testamento vetere circumcisionem creditis accipiendam carnaliter, quamvis ita sit scriptum, neque sub otio ac vacatione colendum sabbatum, quamvis ita legatur, sed nec sacrificiis, ut Moysi videtur, et immolationibus placandum deum ; sed haec quidem ut aliena prorsus et procul a ritu christiano posita ac nulla ex parte probabilia contempsistis. p. 762,14 Quaedam vero eorum etiam divisistis in duo, et partem quidem amplectimini, partem vero respuitis, ut pascha, quod est et ipsum testamenti veteris anniversale sacrum : cuius in celebratione cum sit scriptum vobis non solum agnum mactare edendum sub nocte, sed etiam diebus septem abstinere fermento et esse contentos azymo cum picridiis, vos pascha quidem assumitis, pratermittitis vero ritum illum ac morem, quo cautum est idem debere servari. Item septem dierum hebdomadas, id est pentecosten, quam perinde Moyses certo quodam sacrificiorum et genere et numero imbuendam censet, vos aeque colitis, sed damnata parte eius, id est litationibus ipsis et sacrificiis, quia haec cum christiana fide non congruunt. p. 762,26 De mandato vero abstinendi a cibis communibus visum vobis est et vehementer creditum morticina quidem et immolata esse sane immunda ; de porcina vero idem credere noluistis nec de lepore aut herinacio neque de mullis et lolliginibus ceterisque quae vobis adsapuere generibus piscium, quamvis eadem Moyses omnia immunda esse testetur.